Allorin

Allorin inniheldur virka efnið Allopurinol. Allorin tilheyrir flokki lyfja sem kallast ensímhemlar, sem verka með því að stjórna hraðanum á ákveðnum efnabreytingum í líkamanum, sem í þessu tilfelli leiðir til lækkunar á styrk þvagsýru í plasma og þvagi.

Allorin er notað sem fyrirbyggjandi meðferð við þvagsýrugigt og öðrum kvillum sem tengjast of miklu magni af þvagsýru í líkamanum, þar með talið nýrnasteinum og ákveðnum nýrna- og efnaskiptasjúkdómum.

Ábendingar:

Lækkun á styrk úrats í líkamsvökva og/eða þvagi til að fyrirbyggja eða valda brotthvarfi á þvagsýru og þvagsýrusteinum þegar breytingar á mataræði, vökvainntaka eða stjórnun á undirliggjandi orsök hafa ekki valdið leiðréttingu á hækkuðum styrk úrats.

• Meðferð á helstu klínískum fylgikvillum þvagsýrudreyra, þ.á.m. sjálfvakinni þvagsýrugigt.
• Þvagsýrusteinakvilli.
• Nýrnakvilli af völdum þvagsýru.
• Æxlissjúkdómur og mergvaxtarheilkenni með mikilli frumuendurnýjun sem veldur hækkun á gildi úrats, bæði sjálfvakið og eftir frumudrepandi meðferð.
• Ensímraskanir sem leiða til offramleiðslu úrats, þ.m.t.: Hýpóxanthin gúanín fosforíbósýltransferasi, þ.á.m. Lesch-Nyhan heilkenni. Glúkósa-6-fosfatasi, þ.á.m. glýkógenkvilli. Fosfóríbósýl pýrófosfat syntetasi. Fosfóríbósýl pýrófosfat amíð-transferasi. Adenín fosfóríbósýltransferasi. Glútaþíon redúktasi. Glútamat vetnissviftir.
• Meðhöndlun á endurteknum blönduðum kalsíumoxalatsteinakvilli samhliða þvagsýrudreyra, þegar mataræði, vökvainntaka og önnur meðferðarúrræði hafa ekki virkað.

Börn og unglingar

• Afleiddur þvagsýrudreyri af öðrum uppruna.
• Nýrnakvilli vegna þvagsýru á meðan á meðferð við hvítblæði stendur.
• Arfgengur ensímskortur, Lesch-Nyhan heilkenni (að hluta til eða alger skortur á hýpóxanthin gúanín fosforíbósýltransferasa) og skortur á adenín fosfóríbósýltransferasa.

Frábendingar:

Allorin ætti ekki að nota hjá einstaklingum með ofnæmi fyrir virka efninu allopurinoli eða einhverju hjálparefnanna

Markaðsleyfishafi: Alvogen ehf.