Skip Navigation

Ráðið í 50 fyrstu störfin við nýtt hátæknisetur

Business
28 October 2014

Alvotech, systurfyrirtæki Alvogen, mun ráða í 50 fyrstu störfin við nýtt Hátæknisetur í Vatnsmýrinni á næstu mánuðum. Nú er auglýst eftir 35 háskólamenntuðum Íslendingum með raunvísindabakgrunn og fyrri hluta næsta árs verður ráðningum haldið áfram. Búast má við því að um 200 ný störf verði til í tengslum við starfsemina á næstu árum. Sækja má um ný störf hjá Alvotech á vefnum á slóðinni http://storf.alvotech.is.

Í nóvember 2013 hófust framkvæmdir við nýtt Hátæknisetur sem verður um 13 þúsund fermetrar að stærð. Innan Hátæknisetursins verður unnið að þróun og framleiðslu líftæknilyfja og áætlað er að húsið verði tekið í notkun í ársbyrjun 2016. Sex líftæknilyf eru nú í þróun hjá Alvotech í samvinnu við erlenda samstarfsaðila og fyrstu lyf fyrirtækisins fara á markað árið 2018 þegar einkaleyfi þeirra renna út. Lyfin eru háþróuð stungulyf og m.a. notuð við krabbameini og gigtarsjúkdómum. Sala frumlyfjanna á árinu 2013 á heimsvísu var um 15 milljarðar evra.  Alvotech mun sjá um þróun og framleiðslu lyfjanna en Alvogen og önnur lyfjafyrirtæki munu sjá um markaðssetningu þeirra.

„Það er ánægjulegt að geta byggt upp starfsemi Alvotech hér á landi og að Íslendingar hafi tækifæri til þess að gegna lykilhlutverki í að móta nýtt lyfjafyrirtæki. Alþjóðlegur lyfjamarkaður er á miklum tímamótum um þessar mundir. Mörg af söluhæstu lyfjum heims í dag eru líftæknilyf og fjöldi slíkra lyfja rennur af einkaleyfi á næstu árum. Viðskiptamódel alþjóðlegra samheitalyfjafyrirtækja er að breytast og við viljum vera leiðandi í því ferli. Nú er nauðsynlegt að skapa sér sterka stöðu á sviði líftæknilyfja; það höfum við gert og munum gera áfram.Uppbygging Alvotech er langtímaverkefni og markmið okkar er að komast í fremstu röð samheitalyfjafyrirtækja á þessu sviði. Við höfum ráðið til okkar reynslumikla erlenda lykilstjórnendur og nú leitum við að öflugum íslenskum liðsmönnum til að taka þátt í þessu með okkur,“

Róbert Wessman

Stjórnarformaður og stofnandi Alvotech

Heildarfjárfesting Alvotech á sviði líftæknilyfja er um 500 milljónir evra (75 milljarðar króna) á næstu árum, þar með talin fjárfesting á fullbúnu húsi (um 8 milljarðar króna). Stærsti hluti fjárfestingar er vegna þróunar- og rannsóknarkostnaðar og klínískra rannsókna. Fjárhæð fjárfestingarinnar er um tvöfalt hærri en kynnt var í nóvember 2013 og ræðst af því að ákveðið hefur verið að þróa fleiri lyf en upphaflega hafði verið áætlað. ÞG verktakar byggja húsið í samvinnu við PK arkitekta, Eflu verkfræðistofu og Lagnatækni. Alls munu skapast um 400 ársverk á framkvæmdatímanum. 

„Við sjáum mikil tækifæri í uppbyggingu líftæknifyrirtækja á næstu árum. Sala líftæknilyfja er í miklum vexti og árlegt söluverðmæti líftæknilyfja sem renna af einkaleyfi til ársins 202 er um 100 milljarðar bandaríkjadala. Það er því eftir miklu að slægjast. Við stefnum að því að vera í hópi fyrstu fyrirtækja á markað með okkar lyf þegar einkaleyfi renna út árið 2018 og síðar.“

Andreas Herrmann

Forstjóri Alvotech