Fjölmiðlatorg

Alvotech tilkynnir um nýja samstarfssamninga

Skrifað 27.3.2020 í: Alvogen IS
  • Stefnt er að fyrstu skráningu lyfja Alvotech, systurfyrirtækis Alvogen á þessu ári
  • Um 450 vísindamenn og sérfræðingar starfa nú hjá Alvotech í fjórum löndum

Lyfjafyrirtækið Alvotech, systurfyrirtæki Alvogen hefur gert nýjan samstarfssamning við DKSH, leiðandi fyrirtæki í markaðssetningu lyfja í Suðaustur Asíu. 

Alvotech mun þróa og framleiða líftæknilyfið AVT02, sem hefur sömu virkni og gigtarlyfið Humira, sem er í dag eitt af söluhæstu lyfjum heims. DKSH mun bera ábyrgð á markaðssetningu og sölu lyfsins á mörkuðum sínum í 36 löndum í Asíu.

Alvotech stefnir að því að skrá líftæknihliðstæðulyf (biosmilar) frumlyfsins Humira síðar á þessu ári hjá lyfjayfirvöldum í Evrópu og Bandaríkjunum. Fyrirtækið hefur nú þegar gert stóra samstarfssamningu við leiðandi fyrirtæki í Evrópu, Asíu, Kanada og Ísrael. Frumlyfið Humira seldist fyrir um 19 milljarða bandaríkjadala á heimvísu á árinu 2019.

Mark Levick, forstjóri Alvotech segir ánægjulegt að hefja samstarf við DKSH sem hafi skapað sér sterka stöðu í Asíu. „Við tilkynntum nýlega tímamótasamning við lyfjafyrirtækið STADA og undanfarin misseri höfum við gert mikilvæga samstarfssamninga við leiðandi fyrirtæki í Kína, Japan, Tyrklandi, Kanada, Ísrael, Indlandi og nú bætist DKSH í hópinn. Það styttist óðum í fyrstu lyfjaskráningar Alvotech á stærstu markaðssvæðum heims en fyrstu skrefin verða stigin í þeim efnum síðar á þessu ári. Samstarfssamningar tryggja okkur fjármagn til áframhaldandi þróunar lyfja og uppbyggingar fyrirtækisins og eru því mikilvægar,“ segir Mark.

Líftæknilyf Alvotech sem nú eru í þróun eru hliðstæðulyf við frumlyf á markaði í dag og munu renna af einkaleyfi á næstu árum. Umrædd lyf seljast fyrir rúmlega sjö þúsund milljarða króna á ári á heimsvísu eða um 50 milljarða bandaríkjadala og eru notuð notuð til meðferðar á erfiðum sjúkdómum, eins og t.d. gigt, psoriasis og krabbameini.

Hjá Alvotech starfa nú um 450 vísindamenn og sérfræðingar en 180 starfsmenn voru ráðnir á árinu 2019 til hátækniseturs fyrirtækisins á Íslandi.