Fjölmiðlatorg

ALVOGEN KAUPIR BANDARÍSKT LYFJAFYRIRTÆKI

Skrifað 7.3.2016

Lyfjafyrirtækið Alvogen hefur tilkynnt um fyrirhuguð kaup á bandaríska lyfjafyrirtækinu County Line. Með kaupunum styrkir Alvogen markaðsstöðu sína í Bandaríkjunum og vöruframboð fyrirtækisins eykst.

Kaupin á County Line skapa góð tækifæri til áframhaldandi vaxtar Alvogen í Bandaríkjunum sem er stærsti einstaki markaður fyrirtækisins. Árlegar tekjur County Line eru yfir 13 milljarðar króna (100 milljónir bandaríkjadala). Fyrirtækið sérhæfir sig í sölu lyfja sem eru flókin í þróun en County Line er í dag með 12 lyf á markaði í Bandaríkjunum og níu lyf til viðbótar eru væntanleg á markað á þessu ári.

 „Alvogen hefur verið í miklum vexti undanfarin ár og staða okkar á stærsta lyfjamarkaði heims hefur nú styrkst enn frekar. Sérhæfing okkar í Bandaríkjunum liggur í því að þróa og markaðssetja lyf sem eru flókin í þróun en þau lyf hafa oft á tíðum minni samkeppni. Á undanförnum árum höfum við byggt upp sterkt orðspor fyrir áreiðanleika og góða þjónustu á mörkuðum okkar og munum halda því áfram. County Line er framsækið fyrirtæki og lyfjasafn þeirra er góð viðbót við vöruframboð okkar sem mun styðja við frekari vöxt Alvogen á komandi árum,“ segir Róbert Wessman forstjóri Alvogen.

Kaupsamningurinn er gerður með fyrirvara um samþykki bandarískra samkeppnisyfirvalda.

Við notum vefkökur (e.Cookies) m.a. til að tryggja að vefsíðan okkar virki á réttan hátt og til að greina umferð um vefinn. Nánar um vefkökunotkun.