Fjölmiðlatorg

HM áskorun Alvogen og UNICEF safnaði 8 milljónum í áheitum á landsliðið

Skrifað 28.6.2018 í: Featured news

Þrátt fyrir að íslenska liðið hafi ekki komist áfram í 16 liða úrslit á HM í þetta sinn þá skilaði gengi liðsins á mótinu mikilvægum framlögum fyrir börn í neyð. HM áskorun Alvogen og UNICEF safnaði heilum 8 milljónum í áheitum á landsliðið.

Fyrir þá upphæð fást 414 leikjakassar fullir af leikföngum og námsgögnum sem notuð verða á barnvænum svæðum UNICEF um allan heim. En hugmyndin með HM áskoruninni var að sameina leik og gleði fótboltans og réttindi barna til að stunda tómstundir og leika sér í öruggu umhverfi.

„Þetta var ótrúlega fallegt framtak og gerði það enn meira spennandi að fylgjast með leikjunum,“ segir Bergsteinn Jónsson, framkvæmdastjóri UNICEF á Íslandi. „Við erum ótrúlega stolt af strákunum sem börðust eins og hetjur og gleðjumst yfir því að þátttaka þeirra á stórmótinu hjálpi börnum sem búa í flóttamannabúðum eða á hamfarasvæðum. Strákarnir okkar útveguðu því börnunum okkar mikilvægan stuðning við erfiðar aðstæður. Samstarfsfólk okkar á vettvangi skilar góðum kveðjum og hafa lýst því hversu fallegt það er að Ísland styðji réttindi barna með þessum hætti.“

Alvogen hefur verið dyggur samstarfsaðili UNICEF á Íslandi í fjölda ára og meðal annars styrkt menntaverkefni á Madagaskar, neyðaraðgerðir UNICEF á Sahel svæðinu í Afríku og staðið fyrir styrktartónleikum fyrir börn í Nepal eftir mannskæðan jarðskjálfta þar í landi.

We use cookies to ensure our website works properly and to collect statistics about users in order for us to improve the website. Learn more.